16 januari 2022

Prinselijk nuuts…

Door admin

Vaol trots kondige wae aan; Jeugdprins Mees Ie en Jeugdprinses Imme.
Dit jaor mot d’r zeker get kleur aan de vastelaovendj waere gebrachtj.
En det gaon wae doon!

Wae, Jeugdprins Mees de Ieërste,
Beste keeper vanne Grathemerweeg en
profvoetballer in spee.

En, Jeugdprinses Imme,
beste kickbokster van t hoes en
schone slaopster vanne kuuper.

Verklaore biej deze:

 

Ten ieërste;

Wae zeen blie det wae eindelijk oetgerope zeen gewore en toch ‘n bietje vastelaovendj kinne vere.

Ten twiedje;

Wille wae Jeugdprins Rens en Jeugdprinses Nina bedanken veur de geweldjige vastelaovendj van 2020,
Want dae zeen we nog neet vergaete!

Ten derdje;

Jeugdprinses Imme; deze vastelaovendj höbse geine tied om te knuffelen mit de hundjes en anger bieëste,
Want wae gaon noe volle bak fieëste.

Ten veerdje;

Jeugdprins Mees; leg dae voetbal en dien stripbeuk mer aan de kantj,
Want wae trekke dit seizoen door os Kujeldreierslandj.

Ten viefdje;

Es borebroedspaar zagte we allebei al ens jao,
Ieërst jeugdprinses Imme en ich ‘t jaor d’rnao.

Ten zesje;

Dit jaor geine jeugdraod mer allein adjudanten,
En die weite van wante!

Ten zevendje;

Dit jaor aan breurs en zusse gein gebrek,
Die make veur os de lekkere eier mit spek.

Ten achtste;

Auch pap en mam komme der neet ongeroet,
Die gaon al jaore veur os oet.

Ten negendje;

Mit de vastelaovendj zeen wae d’r al altied bie,
En noe staon we hie zie aan zie.

Ten tiendje;

Laot de sjoeël op maondjigmörge mer zonger os beginnen,
Wae valle later waal binnen.

Ten elfdje;

Wae hebbe vastelaovendj al vreug moge lieëre,
En gaon hoe den auch dit mit uch dubbel en dwars viere.

En det onger os motto:

 

Dit jaor gaotj gae get belaeve,
want fieëste is os met de paplepel ingegaeve!

 

ALAAF!!!

 

Gegaeve te Kelpe – Oler, 16 januari 2022

 422 gelezen totaal,  1 gelezen vandaag